نأسف لغلق المحل اليوم وذلك "لعدم وجود سلع"، كان هذا رد أحد محال التموين على المواطنين بالإسكندرية، وسط غضب شديد من الأهالى الذين يعتمد أغلبهم على هذه السلع التموينية، حيث لم يتسلم المواطنون السلع حتي هذه اللحظة، رغم انقضاء شهر يوليو.
وبسؤال محمود حسين، أحد المواطنين عن رأيهم فى تأخر السلع حتى الآن قال؛ "أنا كل يوم آجى هنا ومفيش جديد لحد دلوقتى مش عارف اخد التموين بتاع الشهر اللى فات، ودخلنا على شهر جديد، فين التنظيم فى كده إننا نقعد أكتر من شهر عشان نستلم التموين ولحد دلوقتى بيخلقولنا أعذار".
وتقول سماح إبراهيم، "بصراحة مبقاش حد عارف أى حاجة خالص قالوا إنهم هيدونا التموين ويزودوه ويسهلوا عملية التسليم مفيش حاجة حصلت من ده غير أنها اتعقدت اكترمن الأول بدليل أن بقالنا أكتر من شهر لسه مستلمناش التموين وكل يوم نيجى إما مفيش أو حاجات كتير ناقصة".
وقالت منال عبد القادر، "فين الحكومة وفين الوزراة فى اللى بيحصل ده؟ إزاى أكتر من شهر مش عارفين نستلم الحاجة وكل يوم يطلعوا فى طريقة جديدة للتسليم، ومفيش حد بيستلم حاجة، أيام مرسى مكانش فى الكلام ده فضلنا نقول مرسى وحش مرسى وحش، لحد ما جالنا الوحش عشان يعرفنا قيمة اللى راح".
ويشتكي على محمد قائلا: "كل يوم آجى اقعد نفس القاعدة والناس تفضل تتعرف على بعض وفى الاخر محدش ياخد حاجة ولو حد اخد حاجة بياخدها ناقصة وبيكون اتسجل إنه اخد كل حاجة بالكامل، هو فين العدل فى كده؟ الناس اللي بتعتمد على التموين ده تموت ولا تشحت يعنى عشان يرتاحوا".
