تكثر شكاوى المواطنين من الارتفاع الكبير لفواتير الكهرباء، ويتهم بعضهم – صراحة – الباعة الجائلين بأنهم السبب وراء ذلك، حيث يقوم البعض منهم بسرقة التيار الكهربائي من المنازل، بحسب قولهم.
بينما يذهب المواطنون – أيضًا – إلى اتهام الحكومة بالعجز عن ردع هؤلاء الباعة، بالرغم من عجزها عن إيجاد حل حقيقي لأزمة الكهرباء.
حيث قال "عماد نبيل": "احنا اتخنقنا والله وجبنا آخرنا، البياعين تسرق كهرباء وتعمل تحميل على الكابلات العمومية وتشغل اللمبات بالنهار، ومحدش بيحاسبها وبيتشطروا علينا احنا الغلابة".
فيما أفادت "حنان عطية" قائلة: "بصراحة احنا مبقناش فاهمين حاجة فى البلد دي، اللى يمشى غلط محدش ييجي جمبه، واللي يمشي صح يتحاسب، يعني لو أنا سرقت كهربا أعتقد محدش هيكلمني، ولا هدفع كهربا زى ما الناس دي بتعمل، فين الحكومة والا مش فاضية".
وقال "جابر نصر": "المشكلة فينا؛ احنا عندنا سلوكيات لازم تتغير، وكل حاجة نقول الحكومة، هي الحكومة هتغيرنا من جوة؟ نغير نفسنا الأول، يعني كل واحد يبدأ بنفسه هنلاقي الحال اتعدل".
وأردف"معتز أحمد": "حاجة تغيظ وتفقع المرارة، ابقى بدفع كهربا وفواتير تيجي قد كده، ليه مش عارف؟ ودول عيني عينك سرقه كهرباء، وبكل بجاحة مشغلينها بالنهار كمان.. فين الحكومة اللي نايمة في العسل؟ والا هي بتجيب حساب الحرامية على فواتيرنا عشان كدة بنلاقى المبالغ كبيرة؟!".
