يشتكي أهالي محافظة البحيرة من نقص أسطوانات الغاز (البوتاجاز)، وعدم تمكنهم من الحصول عليها بـ"بونات" وزارة التموين بعد بدء تطبيق وزارة التموين منظومة البطاقات الذكية الجديدة.
ففي إيتاي البارود حدثت مناوشات ومشادات بين الأهالي عقب علمهم بوصول إحدى السيارات المحملة بأسطوانات الغاز، لبيعها بتسعيرة أعلى من المقررة لها.
يقول حسين الروبي، أحد أهالي إيتاي البارود: "شفنا الذل عشان ناخد أنبوبة واحدة للبيت، وبـ35 جنيه الأنبوبة"، متسائلا: "فين أيامك يا وزير الغلابة؟ فينك يا عودة؟".
واتفقت معه حسنات متولي، ربة بيت، قائلة: "المفروض بيتي فيه 3 أنابيب ولا واحدة فيهم فيها غاز، وبقالي ساعة بتخانق عشان أبدل أنبوبة".
وتابعت لـ"رصد": اشتريت الأنبوبة بـ35 جنيه، يرضي مين ده؟ أجيب منين 120 جنيه كل شهر عشان أغير الأنابيب مرة واحدة؟".
ويحكي عصام إبراهيم، صاحب مزرعة دواجن بإيتاي البارود، معاناته في الحصول على أسطوانات الغاز الخاصة بمزرعته، إذ يقول: "خسرت مع موجة الصقيع الماضية ما يزيد على 30 ألف جنيه".
وتابع لـ"رصد": "الفراخ ماتت، ومش لاقي أنابيب عشان التدفئة في المزرعة، الخسارة دي مين هيتحملها، مش الحكومة عاوزة تغني الغلابة. فين الحنيه دي يا سيسي؟!".
وتعاني محافظات الجمهورية من أزمة أسطوانات غاز طاحنة، ويشتكي الأهالي من ارتفاع سعر أسطوانات الغاز، حتى وصلت إلى 60 جنيه بعدة مناطق.