دشن عدد كبير من نشطاء الـ”فيس بوك” وأهالي بني سويف، حملة لمقاطعة شراء اللحوم البلدية بمراكز المحافظة؛ احتجاجًا على ارتفاع أسعار اللحوم إلى 75 جنيهًا للكيلو بعنوان “بلاها لحمة”.
وفي جولة لمراسل “رصد” في الأسواق ببني سويف، قال خالد سعيد، جزار بمنطقة “موقف صلاح سالم”: “كيلو اللحمة دلوقتي بقى بـ75 جنيه والسبب الأساسي لارتفاع الاسعار هو انخفاض الكميات أساسًا بسبب تراجع الإنتاجية وأسعار العلف بقت نار، فبالتالي الأسعار في اللحمة كل شوية لازم ترفع، وطول ما الحكومة مش بتبص لمشاكل أصحاب المزارع اللحمة هيفضل سعرها يضرب ويعلى كدا ومحدش يقدر يتكلم”.
وقال سعد محمود، جزار بمركز ببا: “الناس بقت مش بتشتري أصلًا لحمة اليومين دول؛ لأن الأسعار بقت نار وهتفضل تغلى كده، أنا كنت ممكن أبيع عجل في يوم، دلوقتي ممكن يقعد معايا 5 أيام ومبعوش كله، مفيش حد بيشتري لحمة دلوقتي كله بيحول على الفراخ وسابوا اللحمة”.
وقال راضي سعيد، أحد أهالي مركز الفشن: “المفروض الحكومة ترجع المراقبة دلوقتي على الجزارين والأسواق ويعملوا تسعيرة واحدة في كل مكان ويوفروا العلف للجزارين عشان ميرفعوش علينا السعر، لكن ولا حياة لمن تنادي، كله كلام بنقوله ومحدش بينفذ حاجة”.
وقال أسامة طارق، تاجر: “فيه نقص كبير في المواشي في السوق وخصوصًا الأيام دي، الأسعار بتاعت العلف غالية وده بيخلينا مش بنجيب مواشي كتيرة فدا أكبر سبب عمل زيادة للأسعار في السوق.. ولما الأسعار زادت بقت الناس مش بتجيب لحمة بقى فيه عجز عندنا وبقت خسارة كبيرة لمعظم الجزارين”.
كان الناشط “رياض رضوان” اقترح على الداعين للحملة مواجهة جشع الجزارين بعمل منافذ بيع للحوم بسعر الجملة لأهالي بني سويف وتخصيص أماكن للبيع من قبل المحافظة تحت إشراف وزراة الصحة”.
بينما أكد “مصطفى العطار”، “أن نجاح الحملة سيتوقف على إصرار المواطن والمقاطعة”.
