سيطرت حالة من السخط على أهالي مركز كفر الزيات، التابع لمحافظة الغربية؛ بسبب توقف سيارات جمع القمامة عن النزول، مما تسبب في امتلاء قرى وشوارع المركز بأكوام القمامة، فضلًا عن الروائح الكريهة المنبعثة منها.
ولم تكن المنشآت الحكومية أوفر حظًا من باقي المنشآت بالمدينة؛ فأكوام القمامة تقع بالقرب من المدارس والمستشفيات والمصالح الحكومية، وتتفاقم المشكلة وتزداد ظهورًا أمام الوحدة المحلية بدلبشان.
وفي تصريحات خاصة لـ”رصد”، قال أحمد المصيلحي، طالب بالقرية: “البلد كلها على الحال ده الناس بتصحى الصبح عشان تشم هواء نقي، وترى منظر جميل خصوصًا عندما تكن المنازل بجوار الأراضي الزراعية، ولكن احنا في كفر الزيات بنصحى عشان نشم روائح كريهة ونرى أكوام القمامة أمام المنازل”.
واتفق معه وصفي سليم، مدرس، “كفر الزيات مركز بلا خدمات عندنا قرى في المركز، المفروض تعد ضمن أفقر قرى بالجمهورية على سبيل المثال قرية أبيار المعدومة من جميع الخدمات، أرسلنا العديد من الشكاوى للمسؤولين، والرد إن شاء الله هتتحل قريب، ومفيش حل”.
وفي سياق متصل، قال محمد حسن، مهندس زراعي: “عربات جمع القمامة مبتنزلش المركز من قبل عيد الفطر، ومش عارفين إيه السبب، الناس بقت بترمي القمامة في الترع والمصارف وفس مجاري مياه الري ومش عارفين خطورة هذا الأمر بس المشكلة مش عندهم المشكلة على الحكومة”.
فيما قال مصطفى سعيد، مزارع: “اللي بيحصل فينا دا حرام لا ميه ولا كهربا والأسعار غالية جدًا وعبء علينا من كل حاجة، والحكومة بتطلع تقول الدنيا وردي والشعب مبسوط، مع إن الشعب مطحون ومش لاقي ياكل ولا حتى عارف يعيش زي الناس بسبب إهمالهم”.
